ދިވެހިރާއްޖޭގެ މޫސުމާ ބެހޭ ގައުމީ އިދާރާއިން މިއަދު، ލަފާކޮށްފައިވާ ގޮތުގައި، ކުރިއަށް އޮތް 3 ދުވަހު (18 މެއި - 20 މެއި) މެދުރާއްޖެތެރެއާއި އުތުރުގެ ރަށްތަކަށް މޫސުން ގޯސްވެދާނެއެވެ. އަދި މިއީ ހުޅަނގު މޫސުމުގެ ބާރު ގަދަވަމުން އަންނާތީވެ މޫސުމަށް އަންނަ ބަދަލެއްކަން ފާހަގަކޮށްފައިވެއެވެ.

ދިވެހިރާއްޖެއަށް ޢާއްމު ގޮތެއްގައި ހުޅަނގު މޫސުމުގެ ވިއްސާރަ ކުރަން ފަށަނީ ކޮންމެ އަހަރެއްގެ ވެސް މެއި މަހުގެ ހިސާބުގައެވެ. އެ އިދާރާއިން ހިއްސާކޮށްފައިވާ މޫސުމާއި ބެހޭ ޚަބަރުގައި ބުނެފައިވަނީ، މި ވިއްސާރައިގައި ހާއްސަކޮށް މެދުރާއްޖެ ތެރެއާއި އުތުރުގެ އަތޮޅުތަކަށް ވައިގަދަވެ ކަނޑުގަދަވާނެ ކަމަށް ލަފާކުރެވޭ ކަމަށެވެ.

މޫސުމާ ބެހޭ ގައުމީ އިދާރާއިން ކުރިއަށް އޮތް 24 ގަޑިއިރަށް ރާއްޖޭގެ މޫސުން ލަފާކޮށްފައިވާ ގޮތަށް ބަލާއިރު މިއަދުގެ މެންދުރު ފަހުން ފެށިގެން ބައެއް ރަށްތަކަށް ކެރީގެ އަސަރު ކުރުން އެކަށީގެންވެއެވެ. މީގެ އިތުރުން ހުޅަނގު ދެކުނާއި ހުޅަނގުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެކަމަށާއި ވިލާ ގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާ ކަމަށް ވަނީ ލަފާކޮށްފައެވެ. އަދި ކަނޑު އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ ކަމަށް މޫސުމާ ބެހޭ އިދާރާއިން ލަފާކޮށްފައިވެއެވެ.

ހުޅަނގުގެ މި ދުވަސްވަރަކީ މޫސުމަށް ބަދަލުތަކެއް އަންނަ ދުވަސްވަރެކެވެ. މި ދުވަސްވަރު ކަނޑުދަތުރުފަތުރު ކުރާ ފަރާތްތަކުން ސަމާލުވުމަށް ކަމާއި ބެހޭ ފަރާތްތަކުން އިލްތިމާސްކުރެ އެވެ.