މެސީގެ ހެޓްރިކަކާއި ބޮޑު ބަހުސެއް: ކާޑެއް ނުދެއްކީ ކީއްވެ؟

2026 ގެ ފީފާ ވޯލްޑް ކަޕްގައި އާޖެންޓީނާއާ އަލްޖީރިއާ ބައްދަލުކުރި މެޗަކީ ބޮޑު ބަހުސަކާއި ހައިރާންކަމެއްގެ ތެރޭގައި، ތާރީޚަށް ވަދެގެންދާނެ މެޗެކެވެ. މިއީ ލިއޮނަލް މެސީ އޭނާގެ ބައިނަލްއަގުވާމީ 200 ވަނަ މެޗު ފާހަގަކުރި ރެކޯޑު ރެޔެވެ.

މުބާރާތުގެ ތަށި ދިފާއުކުރަން ނުކުތް އާޖެންޓީނާއިން ވަނީ 3–0 އިން އަލްޖީރިއާ ބަލިކޮށްފައެވެ. މި މެޗުގައި މެސީ ހެދި ތާރީޚީ ހެޓްރިކާއެކު އޭނާ ވަނީ ވޯލްޑް ކަޕްގެ ތާރީޚުގައި އެންމެ ގިނަ ލަނޑު ޖެހި މިރޮސްލާވް ކްލޯޒާގެ 16 ލަނޑުގެ ރެކޯޑާ އަރާ ހަމަކޮށްފައެވެ. ނަމަވެސް، މުޅި ސޯޝަލް މީޑިއާ މިވަގުތު ހަލަބޮލިވެފައިވަނީ މެޗުގެ ކުރީކޮޅު ހިނގި ވަރުގަދަ ހާދިސާއަކާ ހުރެއެވެ.

ހާދިސާ: މެސީގެ ނުރައްކާތެރި ފައުލް

މެޗުގެ ކުރީކޮޅު، ދެ ޓީމުންވެސް ވަރަށް ވިސްނުންތެރިކަމާއެކު ކުޅެމުންދަނިކޮށް، އަލްޖީރިއާއިން ނުރައްކާތެރި ކައުންޓާ އެޓޭކެއް އުފެއްދިއެވެ. މި ހަމަލާ ހުއްޓުވަން ދިފާއީ ރޮނގަށް ފަހަތަށް ފޭބި މެސީއަށް ބޯޅަ ހޯދަން އުޅުމުގެ ތެރޭގައި އެޅުނު ފިޔަވަޅު ގޯސްވިއެވެ.

މެސީ ވަނީ ވަރަށް ބާރަށް ގޮސް އަލްޖީރިއާގެ ކުޅުންތެރިޔާގެ ފައިގައި ވަރަށް ނުރައްކާތެރިކޮށް ޖަހާފައެވެ. މެޗުގެ ރީޕްލޭތަކުން ފެނުނު ގޮތުގައި މިއީ ކުޅުންތެރިއަކަށް ބޮޑު އަނިޔާއެއް ވެދާނެ ފަދަ "މުޑުދާރު" އަދި ބިރުވެރި ފައުލެކެވެ.

ނިންމުން: މެސީއަށް ކާޑެއް ނުދިނީ ކީއްވެ؟

އަލްޖީރިއާގެ ކުޅުންތެރިން ވަރަށް ބޮޑަށް ނުރުހުން ފާޅުކޮށް ޝަކުވާ ކުރި ނަމަވެސް، މެޗުގެ ރެފްރީ ނިންމީ މެސީއަށް ހަމައެކަނި އަނގަބަހުން ނަސޭހަތް ދިނުމަށެވެ. އަދި އެއްވެސް ކާޑެއް ދައްކާފައެއް ނުވެއެވެ.

މި ހާދިސާގައި ވީއޭއާރް (VAR) އިންވެސް ރެފްރީގެ ނިންމުން ބަދަލުކުރަން ނޭންގުމުން މުޅި ދުނިޔެ ހައިރާންވިއެވެ. ފީފާގެ ގަވާއިދު ބުނާގޮތުން ވީއޭއާރްއަށް މެދުވެރިވެވޭނީ ރެފްރީއަށް "ސާފު އަދި ފާޅުކަން ބޮޑު ކުށެއް" (Clear and Obvious Error) ހެދިފައިވާނަމައެވެ. ވީއޭއާރް ރޫމުން ނިންމީ:

• މެސީގެ ފައުލަކީ ފަރުވާކުޑަ އަދި ރެކްލަސް ފައުލެއް ނަމަވެސް، އެއީ ގަސްތުގައި ކުޅުންތެރިއަކަށް އަނިޔާކުރަން ނުވަތަ ލާއިންސާނީ ބާރެއް ބޭނުންކޮށްގެން ކުރި ފައުލެއް ނޫނެވެ.

• އެއީ ހަމައެކަނި ކައުންޓާ އެޓޭކް ހުއްޓުވަން އުޅުމުގެ ތެރޭގައި ވީ މިސްޓޭކެކެވެ.

ގަވާއިދު އޮންނަ ގޮތުން ވީއޭއާރްއަށް ސީދާ ރަތް ކާޑެއް ދޭން ރެފްރީއަށް ލަފާދެވުނަސް، ރީނދޫ ކާޑެއް ދޭކަށް ނޭންގޭނެއެވެ. އެހެންކަމުން ރަތް ކާޑެއް ނޫންކަމަށް ނިންމުމާއެކު، މެސީ އެއްވެސް އަދަބަކާ ނުލައި ސަލާމަތްވިއެވެ.

ރަތް ކާޑެއްތަ ނޫންތަ؟

ކޮޅެއްގައި ޖެހުން: ފުޓްބޯޅަ ދިރާސާކުރާ ފަރާތްތަކުން ބުނާގޮތުގައި މެސީ ސަލާމަތްވީ ހަމަ ކިރިޔާއެވެ. މިއީ "ގަދަ ރީނދޫ" ކާޑެއް ހައްގު، އަދި ރަތް ކާޑަކާ ދެމެދު ފިތިފައި އޮތް ފައުލެކެވެ. ނަމަވެސް ރެފްރީގެ އަމިއްލަ ވިސްނުމަށް ދޫކޮށްލެވިފައިވާ މިފަދަ ނިންމުންތަކުގައި މެސީއަށް ނަސީބު އެހީވީއެވެ. ރެފްރީ އެވަގުތު ރަތް ކާޑު ދެއްކި ނަމަވެސް ވީއޭއާރްއިން އެ ނިންމުން ބަދަލެއް ނުކުރީހެވެ. މި މެޗުގައި ރެފްރީކަން ކޮށްފައިވަނީ 2022 ވަނަ އަހަރުގެ ފީފީ ވޯލްޑްކަޕްގެ ފައިނަލްމެޗުގައިވެސް އާޖެންޑީނާ ކުޅު މެޗުގެ ރެފުރީއެވެ.

މެޗުގެ ފަހުބައި: ކާޑުން ސަލާމަތްވެ، ހެޓްރިކަކުން ރައްދު ދިނުން

ރަތް ކާޑުގެ ނުރައްކަލުން ސަލާމަތްވުމަށްފަހު، މެސީ ދެން ދެއްކީ އޭނާގެ އަސްލު ކުޅުމެވެ. މެޗުގެ 17 ވަނަ މިނެޓުގައި 30 ޔާޑު ދުރުން ފޮނުވާލި ހިތްގައިމު ގޯލުން އޭނާ އާޖެންޓީނާއަށް ލީޑު ހޯދައިދިނެވެ. އޭގެފަހުން 60 ވަނަ މިނެޓުގައި ދެވަނަ ލަނޑު ޖަހައި، 76 ވަނަ މިނެޓުގައި އޭނާގެ ހިތްގައިމު ހެޓްރިކް ފުރިހަމަކުރިއެވެ.

މިއީ އަނެއްކާވެސް ފުޓްބޯޅައިގެ ބޮޑު ބަހުސެކެވެ. އަލްޖީރިއާ ދަނޑުން ފޭބީ އިންސާފު ނުލިބުނުކަމުގެ އިހުސާސާއެކުގައެވެ. ނަމަވެސް އާޖެންޓީނާ މުބާރާތް ފެށީ އެމީހުންގެ ކެޕްޓަނަކީ ދަނޑުމަތީގައި ހިފަހައްޓަން އުނދަގޫ "ރަސްގެފާނު" ކަން ސާބިތުކޮށްދެމުންނެވެ.