ދިވެހި ފުޓްބޯޅައިގެ މަސްލަހަތު ނުހަނު ގޯސްވެފައިވާ ދަނޑިވަޅެއްގައި، ބީއެމްއެލް ސެންޓްރަލް ރީޒަންގެ ޗެމްޕިއަންކަން ހުރާ ޓީމަށް ދީ، އެފްއޭއެމް އިން އެ ފަރާތަށް ތަށި ހަވާލުކޮށްފިއެވެ. އިއްޔެ ހަވީރު ފެށުނު ދިވެހި ޕްރިމިއާ ލީގުގައި، ހުރާ ޓީމާއި ކުލަބު ގްރީން ސްޓްރީޓް ބައްދަލުކުރި މެޗު ނިމުމާއެކު އެފްއޭއެމް އިން ވަނީ ބީއެމްއެލް ސެންޓްރަލް ރީޒަންގެ ޝީލްޑް ހުރާއަށް ދިނުމުގެ ހަފުލާއެއް ބާއްވާފައެވެ.

މި ހަފުލާ ބާއްވާފައިވަނީ، މުބާރާތުގެ ފަހު މެޗުގައި ކުޑަހުވަދޫގައި ކުޅެ، ހުރާ 4-1 ބަލިވެފައި ވަނިކޮށެވެ. މީގެ އިތުރުން، ކުޑަހުވަދޫގެ ދަނޑުމަތީގައި ހަމަނުޖެހުން ހިންގައި، ހަޑިހުތުރު އެއްޗެހި ގޮވައި، އެފްއޭއެމް އަށާއި ކުޑަހުވަދޫ ދާއިރާގެ ޢިއްޒަތްތެރި މެންބަރަށާއި ވަޑައިގެން ތިއްބެވި ބޭފުޅުންނަށް ގޯނާކޮށް ހަމަނުޖެހުން ހިންގި ހުރާގެ ސަޕޯޓަރުން ވެސް މި ތަށި ހަވާލުކުރުމުގެ ހަފުލާގައި ބައިވެރިވެފައިވެއެވެ.

ކުޑަހުވަދޫއަށް ފުރައްސާރައާއި މަލާމާތް ކުރީ ހުރާގެ ސަޕޯޓަރުން

މި ހަފުލާގެ ތެރެއިން "ހުރާ ޕްލަސް" ކިޔާ ފޭސްބުކް ޕޭޖަކުން ލައިވްކުރި ވީޑިއޯއެއްގައި، ހުރާގެ ސަޕޯޓަރުން ވަނީ ކުޑަހުވަދޫގެ ރައްޔިތުންނަށް އަމާޒުކޮށް މަލާމާތުގެ ބަސްތައް ބުނެ، ފުރައްސާރަކޮށްފައެވެ. ކުޑަހުވަދޫގެ ސަޕޯޓަރުން ފާހަގަކުރި ގޮތުގައި، އެފްއޭއެމްގެ ނިންމުމަކުން ހުރާއަށް ތަށި ލިބުނު ކަމުގައި ވިޔަސް، އެކަމާ ކުޑަހުވަދޫއަށް ފުރައްސާރަކޮށް ބެހެންޖެހޭ އެއްވެސް ސަބަބެއް ނެތްކަމަށެވެ.

"މުބާރާތުގައި ވާދަކޮށްގެން ހުރާއަށް ކުޑަހުވަދޫގެ މައްޗަށް ކުރި ހޯދިފައި ނުވާކަން މުޅި ރާއްޖޭގެ އެންމެންވެސް ހެކިވާނެ، ކުޑަހުވަދޫއިންވަނީ މުޅި މުބާރާތުގައިވެސް މޮޅުކުޅުމެއް ދައްކާފަ." ކުޑަހުވަދޫ ސަޕޯޓަރަކު ބުންޏެވެ.

އެފްއޭއެމްގެ ނިންމުންތަކަށް ބޮޑެތި ފާޑުކިޔުންތަކެއް

ހުރާ އާއި ކުޑަހުވަދޫ ބައްދަލުކުރި މެޗުން ކުޑަހުވަދޫ ތަފާތު ބޮޑު ނަތީޖާއަކުން މޮޅުވެފައިވަނިކޮށް، ހުރާއަށް ތަށި ދިނުމަށް އެފްއޭއެމް އިން ނިންމި ނިންމުމަކީ ކަންކަން ބަލަންޖެހޭ ވަރަށް ނުބަލައި، އެއްކޮޅަށް ބުރަވެގެން ނިންމާފައިވާ ނިންމުމެއްކަން ހާމަވާން ހުރި ކަމަށް ކުޑަހުވަދޫ ކައުންސިލުން ބުނެއެވެ. މި މައްސަލަ އަލުން މުރާޖަޢާކޮށް ބަލައިދިނުމަށް ކުޑަހުވަދޫ ކައުންސިލުން އެފްއޭއެމްގައި އެދިފައިވީ ނަމަވެސް، މިހާތަނަށް އެފްއޭއެމް އިން އެއްވެސް އިޖާބައެއް ދީފައެއް ނުވެއެވެ.

ރާއްޖޭގެ ކުޅިވަރުގެ މައި އިދާރާ، އެފްއޭއެމްގެ ދޯހަޅި އަދި ހަރުދަނާކަމެއް ނެތް ހިންގުމުގެ ނިޒާމުގެ ސަބަބުން ދިވެހި ފުޓްބޯޅައަށް ބޮޑު ހީނަރުކަމެއް އަންނަމުންދާކަން ގިނަ ބަޔަކު ފާހަގަކުރެއެވެ. މިފަދަ ބޭއިންސާފު ނިންމުންތަކުގެ ސަބަބުން، ޢާއްމުންގެ މެދުގައި ފުޓްބޯޅައަށް އޮންނަ ޝައުޤުވެރިކަން ކެނޑި، އެފްއޭއެމްއަށް ކުރާ އިތުބާރު މުޅިން ގެއްލެމުންދާ ކަމަށް ބުނެ ގިނަ ފާޑުކިޔުންތަކެއް ވަނީ އަމާޒުވެފައެވެ.