ޓްރީޓޮޕް ހޮސްޕިޓަލާއި ދ.އަތޮޅު ހޮސްޕިޓަލު، ދ.އަތޮޅު ކައުންސިލު، ދ.ކުޑަހުވަދޫ ކައުންސިލު އަދި ދ.ކުޑަހުވަދޫ ޑަބްލިޔު.ޑީ.ސީ  ގުޅިގެން "މަލްޓި-ސްޕެސަލިޓީ ހެލްތު ކޭމްޕު" މިއަދު ހެނދުނު 8:30 ގައި ވަނީ ފެށިފައެވެ. 

މުޅި ދ.އަތޮޅަށް ހުޅުވާލައިގެން ކުރިއަށްގެންދާ މި ކޭމްޕުގައި 300 އަށްވުރެ ގިނަ ފަރާތުން ޑޮކްޓަރަށް ދެއްކުމަށް އެދިފައިވާކަން ކޭމްޕުގެ ފޯކަލް ޕޮއިންޓް އައިޝަތު މުނީރު ފާހަގަކުރަށްވައެވެ. 2 ދުވަހަށް ކުރިއަށްދާ މި ކޭމްޕުގައި 8 ސްޕެސިއަލިސްޓުން ބަލަމުންދެއެވެ. އެންމެ ގިނައިން އެޕޮއިމްޓްމެންޓަށް އެދިފައިވަނީ އީ.އެން.ޓީ އާއި ޑާމެޓަލޮޖީ އަދި ކަށިގެ ބަލިތަކަށެވެ. މި ކޭމްޕުގައި ދިވެހިރާއްޖެއަށް މަޝްހޫރު ކަށީގެ ބަލިތަކަށް ޚާއްޞަ ޑޮކްޓަރު، ޑރ.މުޒްނީ ބައްލަވައެވެ. 

މި ކޭމްޕުގައި ޔޫރޮލޮޖީ، ގައިނޮކޮލޮޖީ އެންޑް ފާޓިލިޓީ، ސޯލްޑަރ އެންޑް ސްޕޯޓްސް މެޑިސިން، އޮފްތަލްމޮލޮޖީ، ޑާމެޓޮލޮޖީ، ޖެނެރަލް ސާޖަރީ، އޮތޮޕެޑިކްސް އަދި އީ.އެން.ޓީގެ ސްޕެޝަލިސްޓުން ހިމެނެއެވެ.

އަތޮޅުގައި އަދި ރަށުގައި ތިބެގެން ޚާއްޞަ ބަލިތަކުގެ ޑޮކްޓަރުންނަށް ދެއްކުމަށް ހުޅުވާލެވުނު މިކޭމްޕިގެ ސަަބަބުން ގިނަ ފަރާތްތަކަކަށް އެކަމުގެ ފަޞޭޙަކަން ލިބިގެންދާނޭކަމެކެވެ.