ކުޑަހުވަދޫއިން މިމަހުގެ 12 ވަނަ ދުވަހު ކޮވިޑް-19 އަށް ފައްސިވީ މީހާގެ ޙާލު ސީރިއަސްވެ ލ.ކޮވިޑު ފެސިލިޓީއަށް ބަދަލުކުރެވިފައިވާކަމަށް ކުޑަހުވަދޫ އޮންލައިން އަށް މަޢުލޫމާތު ލިބިއްޖެއެވެ. މިހާތަނަށް ކުޑަހުވަދޫއިން ކޮވިޑަށް 22 ފަރާތެއް ފައްސިވެފައިވެއެވެ. އަދި މިވަގުތު 6 ފަރާތެއް ހޯމްކަރަންޓީނު ކުރެވިފައިވެއެވެ.

މިހާތަނަށް ފައްސިވެފައިވާ ފަރާތްތަކުގެތެރޭގައި ހައިރިސްކުމީހުން އެބަތިއްބެވެ. އަދި ކުރިއަށްވުރެ މިފަހަރުގެ ކޭސްތަކުގައި ބަލިޖެހޭ މީހުންނަށް، ބަލީގައި ބޮޑުވަރު ވާކަމުގައި ހޮސްޕިޓަލާއި ހަވާލާދީ މަޢުލޫމާތު ލިބިފައިވެއެވެ. މިހެންކަމުން ކޮވިޑުގެ އެއްވެސް ޢަލާމާތެއް ފެނިއްޖެނަމަ ލަސްނުކުރައްވައި ހޮސްޕިޓަލަށް އެންގުން މުހިއްމެވެ. ހޮސްޕިޓަލުން މިވަގުތުދަނީ ސާމްޕަލްނެގުމުގެ މަސައްކަތް ކުރައްވަމުުންނެވެ. މީގެ ކުރިންވެސް ހޮސްޕިޓަލުންވަނީ ބަލީގެ އެއްވެސް ޢަލާމާތެއްވާނަމަ ލަސްނުކޮށް ހޮސްޕިޓަލުގެ ނަންބަރު 6760087 ނުވަތަ 7903991 އަށް ގުޅުއްވުމަށް އަންގާފައެވެ.

ކޮވިޑު އައުޓްބްރޭކުގައި ގިނަ ޢަދަދަކަށް މީހުން ފައްސިވަމުންތާތީވެ، ކޮންމެހެން ކަމެއްޖެހިގެން ނޫންގޮތަކަށް ނިކުމެ ނޫޅުމަށައި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އެޅުމަށް ހޮސްޕިޓަލާއި ކުޑަހުވަދޫ ކައުންސިލުން އަންނަނީ އިލްތިމާސްކުރަމުންނެވެ. މިހެންކަމުން މިޙާލަތުގައި ހުރިހާ ރައްޔިތުންގެ ފަރާތުން އެއްބާރުލުން ލިބިގެންނޫނީ ބަލި ކޮންޓްރޯލްކުރުމަކީ އުނދަގޫކަމަކަށްވާނެއެވެ.

ރަށުގެ ބޮޑުބަޔަކަށް ބަލިފެތުރި ނުރައްކާތެރި ޙާލަތަކަށް ދިއުމުގެ ކުރިން، ރައްކާތެރިވެ ފަރުދީ ޒިންމާ ނެންގެވުން މުހިއްމެވެ. ރައްކާވެތިބިއްޔާ ދަތުރެވެ.