ދ. ކުޑަހުވަދޫ މެރިންޑްރައިވް މަގުން އިރުން ހުޅަނގަށް ދުއްވާފައި ދިޔަ ސައިކަލެއް ކޮންޓްރޯލު ނުވެގޮސް، އެމަގުގައި ހުރި ސައިކަލުތަކެއްގައި ޖެހި އެކްސިޑެންޓެއް ވެއްޖެ އެވެ.

ފުލުހުން ބުނީ މިއަދު ހެނދުނު 6:26 އެހާކަށްހާއިރު ކުޑަހުވަދޫގައި މީހަކު ދުއްވި ސައިކަލެއް ކޮންޓްރޯލް ނުވެ ގޮސް، ފަސްޓްލައިޓް ކެފޭއެއްގެ ކުރިމަތީގައި ޕާކުކޮށްފައި ހުރި ތިން ސައިކަލެއްގައި ޖެހި އެކްސިޑެންޓެއް ހިނގާފައިވާ ކަމުގެ މައުލޫމާތު ލިބިފައިވާ ކަމަށެވެ. އެ ސައިކަލުގައި ދެ މީހަކު އިންއިރު ދެ މީހުންނަކީ ވެސް 18 އަހަރު ވެފައިވާ ދެ މީހުންނެވެ.

މި އެކްސިޑެންޓު ހިނގިއިރު، އެ ސައިކަލުގައި ދެ މީހަކު ތިބިކަމަށާއި އެކްސިޑެންޓުގައި ސައިކަލު ދުއްވަން އިން އުމުރުން 18 އަހަރުގެ މީހާގެ ގައިގެ އެކިތަންތަނުން މަށައިގެން ގޮސް، ސައިކަލު ފަހަތުގައި އިން އުމުރުން 18 އަހަރުގެ މީހާގެ ކަނާތު ފައިގެ ކުޑަހުޅުން ދުޅަވެެ، ބޮލުގެ މަތިން ކުޑަތަންކޮޅެއް ފަޅައިގެން ގޮސް، ގައިގެ އެކިތަންތަނުން މަށައިގެން ގޮސްފައިވާ ކަމަށް ފުލުހުން ބުންޏެވެ. މީގެއިތުރުން ސައިކަލު ދުއްވަން އިނީ ލައިސަންސް ނެތް މީހެކެވެ.

މި މައްސަލަ ފުލުހުން އަންނަނީ ތަހުގީގު ކުރަމުންނެވެ.